Antzinako Erregimena (Erregimen Zaharra)

 

Antzinako Erregimena edo Erregimen Zaharra Erdi Aroaren amaieratik, XV. mendetik alegia, 1789ko Frantses Iraultzara arte Europan nagusi izan zen erregimen politiko eta soziala izan zen, monarkia absolutista, gizarte estamentala eta industriaren eta merkataritzaren kontrola gremioen eta burgesiaren eskutik funtsezko ezaugarriak izan zituena. Frantzian, Espainian eta Portugaleko sistema politiko nagusia izan zen, eta Europako beste herrialde batzuetan ere erregimen horren ezaugarri batzuk eman ziren. Frantziako Iraultzak eta beste herrialde batzuetan izandako iraultza liberalek erregimen edo sistema horren amaiera ekarri zuten, estatu eta erregimen liberalak ezartzeko, askatasun indibidualetan, botere banaketan eta eliza-estatu erabateko bereizketan oinarrituta, estatuaren interbentzionismo eskasarekin, garai hartan Industria Iraultzaren testuinguruan zabaltzen ari zen kapitalismoaren mesedetan.

Politikan, Antzinako Erregimenean zehar absolutismoa nagusitu zen, monarkaren erabateko boterea alegia, legeak egiteko, estatua administratzeko eta kanpo politika garatzeko; hau da, monarkarengan zetzan subiranotasuna.

Gizartean, Antzinako Erregimeneko ezaugarri nagusia gizarte estamentala zen, gizartea estamentu edo klase sozial itxietan banatzen zuena, noblezia eta kleroa pribilegio bereziekin eta hirugarren estatua edo herri xehea, pribilegiorik gabe, haien artean burgesiak bote ekonomiko handia zuen arren.

Ekonomian, Antzinako Erregimeneko sektore nagusiak nekazaritza eta abeltzaintza ziren. Produktibitate gehikuntza nabarmenak izan ziren sektore horietan mendeetan zehar, teknika berriei eta Ameriketatik etorritako labore berriei (artoa, patata, ...) esker. Lur amortizatuak edo esku hilak, ordea, oztopo izan ziren berrikuntza horiek aplikatzeko.  Koloniek merkataritza bultzatu zuten, haietatik kakaoa, kafea eta bestelako produktuak ekarriz eta haietara artisauek egindako produktuak eramanez. Merkataritza horrek finantza-sektorea indartu zuen eta ondorioz kapital metaketa handia izan zen estatuaren eta aberasten ari zen burgesiaren eskuetan. Nekazaritzako produktibitate handiak, baliabide finantzarioek eta XVIII. mendean izan ziren berrikuntza teknologikoek Industria Iraultzarako bidea zabaldu zuten.

Ikus, gainera

• Espainiako historia: Antzinako Erregimenaren krisialdia (1808-1814)
• Aro Garaikidea, Frantziako Iraultzarekin batera hasi zen aldi historikoa
• Aro Modernoa, Antzinako Erregimena garatu zen aldi historikoa, XV-XVIII mende bitartean