Kapitalaren kostua edo kapital kostua enpresa baten finantzazio-kostua da, eskuratu dituen baliabide finantzarioengatik jasaten duen kostua da, tasa edo portzentaje bateratu gisa adierazita (ikus, gainera, diruaren prezioa). Kontzeptu konplexua da, alde batetik noren ikuspegitik kalkulatzen den araber, enpresaren kostu gisa edo finantzatzaileek exijitzen duten errentagarritasunaren aldetik.
Enpresaren ikuspegitik, kapitalaren kostuak enpresako bazkideen akzioen kostua nahiz pasibo galdagarri desberdinen kostuak barnehartzen ditu, eta beraz batez besteko kostu gisa kalkulatu behar da. Hartzekodunen kasuan, kapitalaren kostua esplizitua da, agerikoa, enpresak interesak ordaintzen dituelako horren trukean; akziodunen kasuan, berriz, kostua inplizitua da, akzioek osatzen duten kapitala eskuratzearen trukean ez baitago zuzeneko ordainik, eta beraz aukera-kostua da: enpresak kapital hori bere jardunean inbertituko ez balu, beste inbertsio-aukera batzuetan lortuko lezakeen errentagarritasuna litzateke. Kalkulu hori konplexua denez, egin daiteke baita ere enpresak akziodunak enpresan gera daitezen etorkizunean eskaini behar dituen dibidenduak deskontatuz.
Finantzatzailearen ikuspuntutik, kapitalaren kostua enpresak inbertitzaileei eskaini behar dien gutxieneko ordainsaria dela esan daiteke, merkatuak orokorrean eskaintzen duen errentagarritasunarekin alderatuz enpresan inbertitzea erabaki dezaten, edota behin enpresan inbertitu dutela, akzioen prezioa -enpresaren balioa, finean- jaitsi ez dadin merkatuan. Ikuspegi horretatik, kapitalaren kostua kalkulatzeko modu bat CAPM eredukoa da: arriskurik gabeko tasa gehi merkatuan une batean dagoen arrisku-saria, enpresaren berezko arrisku-koefiziente batekin biderkaturik.
Bi ikuspegiak lotuz, enpresak finantza baliabideen kostua estaltzeko lortu beharko lukeen gutxieneko errentagarritasun-tasa da kapitalaren kostua. Enpresak eskaintzen duen errentagarritasuna kapitalaren kostua baino handiagoa bada, enpresan inbertitzea onuragarria izango da. Enpresaren finantzatzaileek enpresan lortzen duten errentagarritasun-tasa baliabideen batez besteko kostua baino txikiagoa bada, berriz, ez dira prest egongo enpresa finantzatzeko, eta akziodunek, beraien aldetik, akzioak salduko dituzte.
Beste hizkuntzetan: gaztelaniaz, coste de capital.
Ikus, gainera
Erabili ezazu galdetegi hau artikulu eskaera bat bidaltzeko. Lehenbailehen osatzen saiatuko gara.
Gure azken edukien berri jaso nahi baduzu zure email helbidean, egin zaitez harpidedun hurrengo galdetegi hontan.
