Internet-en, sare sozialak edo gizarte-sareak erabiltzaileak elkarrekin harremanetan jartzeko aukera ematen duten komunikabideak dira. Teknologia informatikoetan oinarrituak, banakoei zein erakundeei euren profil pertsonala eratu, edukia osatu, eta profila eta igotako edukia beste erabiltzaile batzuekin partekatu eta iruzkintzeko aukera ematen dutenak. Sare sozial horietan elkarrekin loturiko erabiltzaileek osatzen duten taldeari ere sare soziala deitzen zaio. Sare sozialak esanahi bikoitza du, beraz: pertsonak harremanetan jartzeko webgunea eta webgunearen bitartez elkarrekin loturiko pertsona eta erakundeen multzoa. 1997 urtean sortu zen lehen sare soziala, SixDegrees.com izenekoa, profilak egin, lagun zerrendak osatu eta beranduago lagun zerrendetan zehar nabigatzeko aukera ematen zuena.1
Pertsona ezagunekin harremanetan jartzeaz gainera, adiskide berriak egiteko erraztasun handia dago sare sozialetan, "ezagunen ezagunak" eta "lagunen lagunak", pertsona bakoitzaren adiskide taldea alegia, bere adiskide guztien bistara geratzen direlako gehienetan, ezezagunak diren pertsonen arteko harremanak zabalduz, muga jakinik gabe. Profilaren ikusgarritasuna, ordea, aldakorra sare sozial batetik bestera: guztiz publikoa izan daiteke, edo erabiltzailearen sare sozialeko kideentzat soilik eskuragarria. Denetariko sare sozialak daude: profesionalak eta enpresak harremanetan jartzen dituztenak (Linkedin), harreman erromantiko eta sexualetarako (Meetic, Badoo), mezu politiko eta sozialak zabaltzeko (Twitter), zientzialariak harremanetan jartzeko (Researchgate), ...
Sare sozialak XXI. mendeko fenomeno sozial nabarmenena dira, zalantzarik gabe, ondorio sozial, ekonomiko eta politiko handi eta izugarriekin. Izugarriak, sare sozialek partaideek euren jardunean uzten dituzten arrasto eta informazio guztiak arakatu eta merkantilizatu egiten dituztelako, eta politika arloan mezu eta diskurtsoen manipulazioa, hala nola albiste faltsuen bitartez, ohikoa delako haietan. Markus Gabriel alemaniar filosofoak herritarrak sare sozialetan proletario digital bilakatzen direla ohartarazi du, sare sozialetan egiten dugun "lana", informazioa alegia, bereganatuz, eta pertsonengan adikzioa (ikus, hiperkonektibitatea) sorrarazten duten algoritmoak azkartuz eta sendotuz, faltsukerietan oinarritutako emozioak eraginez ("atsegin dut", bisita eta lagun kopuruak) (2).
Ikus, gainera
Erabili ezazu galdetegi hau artikulu eskaera bat bidaltzeko. Lehenbailehen osatzen saiatuko gara.
Gure azken edukien berri jaso nahi baduzu zure email helbidean, egin zaitez harpidedun hurrengo galdetegi hontan.
