Gastuak (kontabilitatea)

Adiera ekonomiko hutsean, gastua dirua zerbaitetan xahutzea da. Kontabilitatean, ordea, gastuak edo xahupenak adiera zehatzagoa du: gastu ekonomikoa gastua izango da kontabilitatearen adieran, ekitaldi ekonomikoan zehar kontsumitu egiten denean, edota inbertsioa, aldi batean baino gehiagotan zehar kontsumitzen denean. Beste definizio baten arabera, kontabilitateko gastua sortzen da ondare garbia gutxitu egiten denean, galera gehituz edota mozkina murriztuz.

Adibidez, adiera arruntean edo ekonomikoan "horrek autoa erosita gastatu du dirua" esaten denean, kontabilitatearen ikuspegitik hori ez litzateke gastu bat, inbertsio bat baizik, diruaren trukean autoa eskuratu duelako, lehen dirua zeukan eta orain autoa dauka (ondarearen balioa ez da aldatu), urte batzuetarako erosi du eta beraz inbertsioa da, gero autoa berriz ere salduz berreskuratuko duena, galerekin edo mozkinekin bada ere. Hala ere, aldiro auto klasiko hori erabiltzen duenean, autoa zahartuz edo pixkanaka hondatuz doa, bere ondare garbian murrizketa bat sortuko litzateke, autoak balio galera berreskuraezina jasan duelako edo ordezko piezak eta abar erosi behar izan dituelako: zahartzeagatiko balio-galera horrek edo ordezko piezen erosketak ondare-murrizketa dakarte, eta beraz kontabilitatearen ikuspegitik gastuak dira.

Ez dira nahastu behar gastua eta kostua; askotan biak badatoz ere, badira gastuak kostu ez direnak eta kostuak gastu ez direnak. Halaber, ez dira gauza bera gastua eta diru-irteera edo despoltsapena, izan badirelako gastuak diru-irteera ez dakartenak (adibidez, aktibo baten amortizazio-kuotak).