Prezio-gerra

Prezio-gerra merkatu batean diharduten enpresek euren produktuaren prezioa lehiakideen prezioaren azpitik jartzeko estrategia da, merkatu-kuota mantendu edo handitu eta lehiakideak kaltetu edo merkatutik kanporatu asmoz, eta lehiakideen prezio baxuaren aurkako erantzun gisa erabakitzen dena, halako moldez non merkatuko enpresen artean erantzun-kate edo sorgin gurpila sortzen den, prezioan beherakada nabarmena eraginez eta batzuetan kostuak ezin berreskuratzera eramanez. Bereziki enpresa oligopolistikoen artean gertatzen den fenomenoa da, oligopolioko enpresak baitira euren prezioa jartzerakoan beste enpresen prezioari begira jartzen direnak. Prezio-gerretan enpresa guztiak ateratzen dira galtzaile azkenean, eta horregatik ohikoa da baita ere enpresak prezio-gerrak geldiarazi edo saihesteko hitzarmenak adostea (ikus, kolusioa).