Konpetentzia espezifikoak

Hezkuntzan, konpetentzia espezifikoak lan jakin bat burutu edo jarduera jakin bat garatzeko beharrezkoak diren trebetasun eta ezagutzen multzoa da, lan edo jarduera horri bereziki dagozkionak. Hezkuntza-sistemaren baitan, eta Espainian LOMLOE legeari jarraiki, konpetentzia espezifikoak jakintza-arlo edo irakasgai jakin bati dagozkionak dira, jakintza-arlo edo irakasgai bakoitzean oinarrizko jakintzak eta, maila globalean, hezkuntza-etapa bakoitzaren amaieran lortu beharreko funtsezko konpetentziak, irteera-profilean definituta, eskuratze aldera. Konpetentzia espezifiko horiek ikaskuntza-egoerak garatuz eskuratzen dira. Heldu beharreko irteera-profila eta konpetentzia espezifikoen arteko lotura deskriptore operatibo direlakoen bitartez egiten da (adibidez, irteera-profileko deskriptore bat arrazoiketak garatzeko gaitasuna izan daitekeela, matematika irakasgaian deskriptore horri dagokion konpetentzia espezifikoa arrazonamendu induktiborako gaitasuna izan daiteke, bere aldetik beste deskriptore batzuk definitzeko ere erabil daitekeena). Esan liteke, beraz, konpetentzia espezifikoak irteera-profilak irakasgai indibidualetara moldatzeko konpetentziak direla. Horretaz gainera, konpetentzia espezifiko bakoitza ebaluaketa-irizpide konkretuen bitartez definitzen da.

Ikus, gainera

• Konpetentziak hezkuntzan