Siderurgia (definizioa) eta industria siderurgikoa

Siderurgia burdin mea eraldatu eta burdina eta horren aleazioak, hala nola altzairua, ekoizteko teknika eta jardueren multzoa da. Teknika horiek erabiliz burdina ekoizten duen industriaren sektore ekonomikoari deitzen zaio industria siderurgikoa (labur industria siderurgikoari ere siderurgia deitzen bazaio ere), orokorrean era guztietako metalak ekoitzen dituen industria metalurgikoaren atala.

Industria siderurgikoa oinarrizko industrietako bat da, beste industria eraldatzaileentzako burdina eta altzairua eskainiz, modu sinple batean landua, hala nola xafla nahiz barra moduan. Beste alde batetik, azpiegitura eta instalakuntza handiak (labe garaiak, adibidez) behar dituen industria da, eta kapital fisiko trinkoa behar duena, inbertsio ekonomiko handiekin. Hori dela eta, industria siderurgikoa enpresa handien esku egoten da. Industria siderurgikoaren beste ezaugarri bat bere kontzentrazio geografikoa da, bere neurriko garraio azpiegituren eta burdinaren industria eraldatzaileen ondoan. Euskal Herrian adibidez, industria siderurgikoaren kontzentrazio handia izan zen, beste industriekin batera, Bilboko Itsasadarreko Ezkerraldean.

Ikus, gainera

• Bessemer bihurgailua
• Koke ikatza
• Labe garaiak