Hizkuntza transmisioa

Hizkuntzaren transmisioa gizatalde batean gertatzen den hizkuntza natural eta propioaren transferentzia da, hizkuntza bizirik iraunarazten duena, belaunaldiz belaunaldi (ikus, belaunaldien arteko transmisioa), etenik gabe. Bereziki familiaren bitartez bideratzen da (transmisio naturala), baina eskolan, lagun taldean nahiz hedabideen bitartez gertatzen da (transmisio kulturala). Hala eta guztiz ere, prozesu jarraitu eta norabide bakarrekoa -helduengandik haurrengana- izatetik urrun, transmisioa fenomeno konplexua da, maila desberdinetan gertatzen dena eta beste hizkuntzen eraginpean dagoena. Transmisioaren konplexutasuna alde batera utzi eta fenomeno sinpletzat hartzeak, transmisioa guraso eta eskolaren esku baino ez uzteak alegia, transmisioaren porrota eragiten du maiz. Halaber, transmisioa erreprodukzio determinista eta monolitiko huts gisa hartzeak ere arazoak ekar ditzake, transmisioaren hartzaileek bide berriak zabaltzeko joera izango baitute euren sozializazioa garatu eta identitate propioa eratu nahian.

Beste hizkuntzetan: gaztelaniaz, transmisión lingüistica.