Ekoizpen funtzioa

Ekonomian, ekoizpen-funtzioa ekoizpen faktoreen kopuruak eta ekoizpena lotzen dituen funtzio matematikoa da. Funtsezko tresna da ekoizpen prozesuaren teknologia aztertu, produktibitatea neurtu, prozesuko eraginkortasuna baloratu, eta azkenean enpresak kostuak minimotu eta mozkinak maximotzen dituzten ekoizpen-mailak zehazteko. Guzti horretarako, errendimendu beherakorren legea, epe laburrera, eta eskala-ekonomiak, epe luzera, aztertzen dira, ekoizpen funtzioen propietate jakin batzuk.

Era sinpleenean, input edo ekoizpen-faktore bakarra hartzen du, eta orduan ekoizpen-funtzio totala deitzen zaio. Input bat baino gehiago hartzen dituenean aldagai independente gisa, input horiek modu ezberdinetan konbinatzen dira ekoizpen-maila batera heltzeko. Konbinazio modu horri ekoizpenaren teknologia deitzen zaio eta haien artean Leontieff, Cobb-Douglas eta ordezko perfektuen teknologiak bereizten dira besteak beste, azkenean izen bereko ekoizpen funtzioak emango dituztenak, hurrenez hurren.