Ekoefizientzia

Ekoefizientzia produktu edo zerbitzu baten ekoizpenaren balioaren eta ekoizpenak nahiz ekoizpen horren kontsumoak ingurumenean sorrarazten dituzten kalteen arteko erlazioa da. Ekoefizientzia hobetzeko bi bide daude, produktuaren edo zerbitzuaren diseinutik bertatik garatu beharrekoak: ekoizpenean eta kontsumoan ahalik eta baliabide material eta energetiko gutxien erabiltzea, eta horien ondorioz sortutako hondakinak eta kutsadura ahalik eta txikienak izatea. Ekoefizientzia da, ekonomia zirkularrarekin eta kontsumoaren gutxitzearekin batera, jasangarritasunerako baldintza nagusienetakoa.

Orokorrago, jarduera ekonomi batez mintzatuz, ekoefizientzia jarduera ekonomiko jakin batek ingurumena zaintzeko hartan izan behar lukeen eragin minimoa da, aldi berean bere balio erantsia maximotuz. Ekoefizientzia neurtzeko, enpresa edo jarduera jakin batek sortutako balio erantsia zati ingurumenean eragindako kalteen neurria egiten da. Bi modu daude, beraz, ekoefizientzia gehitzeko: balio erantsia gehitu, ingurumenari kalte gehigarririk sortu gabe, edota balio erantsia konstante atxikiz, ingurumenari eragindako kalteak gutxitzea.

Ikus, gainera

• Aztarna ekologikoa
• Efizientzia
• Enplegu berdea