Psikologian, teoria kognitibo-sozialak edo teoria soziokognitiboak gizabanakoaren portaeraren eta ikaskuntzaren mekanismoak azaltzen dituen teoria-multzo bat da, haien artean ezagunena Albert Bandura psikologoaren ikaskuntza sozialaren teoria izanik. Teoria horiek ikaskuntza prozesua gizartean, besteekiko interakzioa, eta bereziki besteek egiten dutenari erreparatuz egiten dela baieztatu eta ikaskuntzan gizabanakoaren barneko prozesu kognitiboak nabarmendu egiten dituzte, euren erabaki eta ekintzen ondorioak aztertuz eta aurreikusiz. Aldi berean, gizabanakoak ingurunean duen eragina ere elementu garrantzitsua da teoria horietan, gizabanakoaren eta ingurunearen arteko determinismo erreziproko edo aldebiko baten bitartez. Hori horrela, teoria kognitibo-sozialak konduktismotik bereizten dira argi eta garbi: alde batetik, konduktismoak ingurunearen eragina azpimarratzen duelako, teoria kognitibo-sozialetan gizabanakoaren ahalmen kognitiboak nabarmentzen diren bitartean; eta bestetik konduktismoan gizabanakoaren prozesu mental eta kognitiboak kutxa beltz batean kokatzen direlako, atzeman ezinik, teoria kognitibo-sozialetan erabateko garrantzia duten bitartean. Banduraren ikaskuntza teoriarekin batera, teoria soziokognitiboen artean, Lev Vygotskyren (1896-1934) teoria soziokulturala eta Walter Michels (1930-2018) psikologoaren ekarpenak ere aipatu behar dira.
Erabili ezazu galdetegi hau artikulu eskaera bat bidaltzeko. Lehenbailehen osatzen saiatuko gara.
Gure azken edukien berri jaso nahi baduzu zure email helbidean, egin zaitez harpidedun hurrengo galdetegi hontan.
