Ikaskuntza kooperatiboa (lankidetzazko ikaskuntza)

Ikaskuntza edo ikasketa kooperatiboa, lankidetzazko ikaskuntza edo ikaskidetza ikasle talde batean modu kolektiboan, interakzioan eta elkarlanean garatzen den ikaskuntza mota da. Ikaskuntza kooperatiborako ingurune egokia da ikaskuntza horretarako oinarri nagusiena, eta horren elementuak dira irakaslea bera, bideratzaile eta elkarrizketatzaile moduan jokatu behar duena (ikus, hezitzaile dialogikoa), talde eraketa egokia, hala nola ikasle tipologia anitzarekin, ikasleen arteko ezagutza-transferentzia ziurtatzeko, ikaslearen jarrera indibidual egokia eta lankidetza maila homogeneoa taldearen baitan, alde batetik lan asko eta bestetik lan eskasa egiten duten ikasleek osaturiko taldeak baztertuz. Nolanahi ere, ez da identifikatu behar ikaskuntza kooperatiboa talde-lanarekin, talde-lana tresna ohikoena izaten den arren; hain zuzen ere, ikaskuntza kooperatiboak lan banakakoa edo mistoa (taldeka-banaka) ere izan daiteke. Dena den, ikaskuntza kooperatiboan taldeak informalak (gehienetan minutu batzuetan garatzen direnak), formalak (egun eta asteetan zehar luzatzen direnak) eta oinarrizkoak (ikasturte osokoak) bereizten dira. Garrantzitsua da ikaskuntza kooperatiboan sasitaldeak atzeman eta berregitea, non itxuraz elkarrekin aritzen diren ikasleak, baina bakoitzak bere interes eta helburu propioen arabera jokatzen duen, betiere ikaskuntza kooperatiboaren mamia eta helburuak garbi utzita.

Halaber, lankidetzazko ikaskuntza aurrera garatzeko ezinbestekoa ikasleen artean ikas-komunitate edo ikaskuntza-komunitate bat eratzea, zeinaren baitan ikasleen arteko ikas-harremanak bideratuko diren. Lankidetzazko ikaskuntza garatzeko funtsezko tresna da, beste alde batetik, ekintza dialogikoa da, ikas-komunitatea osatzen duten guztien artean. Metodologia kooperatiboak osatzeko bestelako tresnak proposatu dira eta haien artean ohikoena proiektuetan oinarritutako ikaskuntza da.

Ikaskuntza kooperatiboa bereziki ikaskuntzaren teoria konstruktibistaren baitan aztertu eta bultzatu den ikaskuntza da, horren inguruan ikaskuntzarako metodologia eta pedagogia oso bat sortzeraino. Ikaskuntza kooperatiboaren aitzindaria Johann Heinrich Pestalozzi (1746-1927)  suitzar pedagogoa izan zen, Jean-Jacques Rousseauren dizipulua. Gerora, hainbar teoria eta eredu pedagogikok garatu dute ikaskunta kooperatiboa, bereziki ikaskuntza sozialaren eta konstruktibistaren inguruan.