Gizapedia

Balio Eguneratu Garbia (BEG)

KategoriakEnpresa

Balio Eguneratu Garbia, BEG akronimoaz ere deitua, edo Eguneratutako Balio Garbia (EBG) inbertsio batek ekarriko dituen etekinen neurri absolutu bat da, horretarako inbertsioak ekarriko dituen kutxa fluxu garbiak (ordainketak ken kobrantzak) eguneratuz, gaur egunera ekarriz, deskontu tasa jakin batean. Zehatzago, hau da BEG kalkulatzeko formula:

    \[BEG=-A+\sum_{t=1}^n\cfrac{Q_t}{(1+k_t)^t}\]

non k_t eguneratze- edo deskontu-tasa den, kapitalaren aukera kostua (enpresak inbertitzerakoan duen aukera onenaren errentagarritasuna), A inbertsioa dakarren hasierako ordainketa, eta Q_t t uneetan gertatzen diren kutxa-fluxuak.

BEG positiboa duten inbertsioak burutuko dira, enpresari etekinak ekarriko dizkiotelako. Inbersioak bateraezinak diren kasuetan, BEG handiena duen inbertsioa burutuko da. Horrela, BEG irizpideak onarpen/ukapen irizpide garbia ematen du, eta gainera diru fluxuak eguneratu egiten du etekinen egungo balioa kalkulatuz deskontu-tasaren bitartez. Ez du, ordea, inbertsio-proiektuaren errentagarritasunaren neurririk ematen (horretarako Barne Errendimendu Tasa kalkulatu behar da). Gainera, BEG kalkulatzerakoan zaila izaten da deskontu tasa zehatza finkatzea eta diru fluxuak aplikaturiko deskontu tasan berriz ere inbertitu edota zorrak kitatu eta bazkideak saritzeko erabiltzen direla suposatzen du inplizituki.

Hala ere, gehien erabiltzen den inbertsioen hautapenerako metodoa da, diru-fluxuak zein unetan sortzen diren kontuan hartzen duelako, eta horregatik metodo dinamikoa dela esaten da, inbertsioen hautapenerako erabiltzen den payback metodo estatikoa ez bezala.

Balio Eguneratu Garbiak badu beste alde batetik harreman estua Barne Errendimendu Tasarekin (BET), BET Balio Eguneratu Garbia 0 egiten duen deskontu tasa baita, inbertsioaren errentagarritasun erlatiboaren neurri bat alegia. Bi irizpideek, BEG eta BET, ondorio kontrajarriak eman ditzakete ordea, Fisher ebakidura gertatzen denean hain zuzen.

Adibidea

Enpresa bati inbertsio hau proposatzen zaio: 1000 euroko ordainketa egin behar du hasieran, eta gerora 600 eta 700 euroko diru fluxuak izango ditu urtebetera eta bi urtera hurrenez hurren. Kapitalaren aukera kostua %10 izanik, zer erabaki behar du?

    \[BEG=-1000+\cfrac{600}{1.1}+\cfrac{700}{1.1^2}=123.9\]

Enpresak inbersioa burutuko balu, 123.9 euroko etekina eskuratuko lituzke, etekinak gaur egunera ekarrita. Beraz, BEG positibo horrekin, enpresak aurrera eraman beharko luke proiektua.

Loturiko artikuluak

  • Balio erantsia

    Balio erantsia enpresa batean izandako produktu eta zerbitzuen salmentak ken kanpotik erositako produktu eta zerbitzuen kostua da. Enpresak bere jarduera ekonomikoaren bitartez erantsi egiten duen balioa da, sortzen…

  • Barne Errendimendu Tasa

    [latexpage] Barne Errendimendu Tasa edo Barne Errendimenduaren Tasa (BET), Barne Itzulerako Tasa (BIT) edo Itzulerako Barne Tasa (IBT) ere deitua, inbertsio baten errentagarritasunaren adierazle bat da, diru-sarrerak eta irteerak, kaxa-fluxuak alegia,…

  • Deskontu-tasa

    Finantzetan, deskontu-tasa, batzuetan eguneratze-tasa ere deitua, une jakin bateko kapital edo orokorrean diru-kopuru batek iraganera edo atzera eramanda hartzen duen balioa kalkulatzeko erabiltzen den tasa edo portzentaje bat…

480 hitz

Artikulu bat eskatu

Erabili ezazu galdetegi hau artikulu eskaera bat bidaltzeko. Lehenbailehen osatzen saiatuko gara.



Harpidetu zaitez

Gure azken edukien berri jaso nahi baduzu zure email helbidean, egin zaitez harpidedun hurrengo galdetegi hontan.