Hizkuntzalaritzan, kode-aldaketa gertatzen dela esaten da, hiztun batek bere diskurtsoan bi hizkuntza (edo gehiago) txandakatu edo batetik bestera aldatzen denean. Hizkuntza-ukipenak eragindako fenomenoetako bat da. Kode-aldaketa bi eratara gerta daiteke, perpausaren barnean eta perpausen artean; adibidez, “Has hecho las etxeko lanas?”, perpausaren barneko kode aldaketa litzateke; eta “Ez dut egin. No me ha dado la gana”, perpausen artekoa. Hizkuntzalaritza batzuek perpaus barneko kode-aldaketari kode-nahasketa deitu izan diote, kode-aldaketa terminoa perpaus arteko aldaketarako atxikiz. Batzuetan, kode aldaketatik haratago, hiztunak hizkuntza bateko gramatika beste hizkuntzako kodera aplikatzen du, eta orduan kode-aldaketaz gainera, hizkuntza-interferentzia sortuko litzateke (“etxeko lanas” kasuan bezala).
Kode-aldaketak egitearen arrazoi nagusia diglosia egoera da. Diglosian hizkuntza nagusiaren lexikoa eta gramatika bertako hizkuntzan txertatzeko joera izaten da, batzuetan hizkuntza nagusiak duen prestigio handiagoagatik eta beste batzuetan hiztunari zaila, deserosoa edo ezohikoa zaiolako bere hizkuntzan adierazi nahi duena osatzea. Hizkuntza nagusia erabat inposatu denean, bertako hizkuntza da batzuetan txertatzen dena diskurtsoan, gehienetan adierazkotasuna lortzeko (adibidez, “si lo hace de esa forma, va a conseguir el efecto contrario, ulertzen?”).
Beste hizkuntzetan: gaztelaniaz, cambio de código.
Erabili ezazu galdetegi hau artikulu eskaera bat bidaltzeko. Lehenbailehen osatzen saiatuko gara.
Gure azken edukien berri jaso nahi baduzu zure email helbidean, egin zaitez harpidedun hurrengo galdetegi hontan.
