Ganbarako lana (kartzelako lana)

Bertsolaritzan, ganbarako lana edo kartzelako lana bereziki txapelketetan bertsolariek, banaka edo binaka, gai jakin bati buruz jarduteko bertsoaldi mota bat da, bitartean beste bertsolariak aparteko gela batean daudelarik, bertsolari horien jarduna entzun ezinik. Geroago, txandaka eta zozketaz jarritako ordenan, beste bertsolari horiek ere gai berari buruzko bertso-jarduna egingo dute. Kartzelako lanaren helburua lehiakideek euren bertso jarduna prestatzeko besteen denbora berdina izatea da, denek berdinari buruz aritu behar dutenez. Kartzelako lanaren modalitatea 1960ko txapelketan garatu zen lehen aldiz. Kartzelako lana antzinako izena da, 1960ko hamarkadan Fernando Artola Bordari idazleak jarritakoa; izan ere, 2022an Bertsozale Elkarteak kartzelako lanari aurrerantzean ganbarako lana deitzea erabaki zuen.