Banku-kontua partikular, enpresa edo beste erakunde batek banku batean diru ezarpenak eta ordainketak egiteko kontratatzen duen finantza-produktua da, ohikoan hortik zuzenean helbideratzeak, berehalako eskudiru-ateratzeak, diru-sarrerak eta transferentziak egiteko nahiz gordailu, inbertsio-funts eta beste finantza-produktuetarako bitarteko gisa erabiltzen dena. Finantza-produktu zabala da, eta aurrezki-kontuak, ageriko gordailuak nahiz kontu korronteak barne hartzen ditu, bakoitza bere ezaugarri bereziekin. Nolanahi ere, komisioak izaten dituzte; sarri kreditu nahiz zor-txartelak ere izaten dituzte atxikita, ordainbide gisa. Bere ezaugarri nagusia erabateko likidezia da, kontu korrontearen titularrak edozein unetan baitu eskuragarri bere kontuaren saldoa, eskudirutan atera edo banku-transferentziak egiteko. Horrexegatik, banku-kontuetako zenbatekoa enpresen aktibo erabilgarrian barne hartzen da, eskudiruarekin batera.
Banku-kontu guztiak IBAN izena duen 20 digitoko zenbaki batez identifikatzen dira.
Beste hizkuntzetan: ingelesez, bank account; gaztelaniaz, cuenta bancaria.
Erabili ezazu galdetegi hau artikulu eskaera bat bidaltzeko. Lehenbailehen osatzen saiatuko gara.
Gure azken edukien berri jaso nahi baduzu zure email helbidean, egin zaitez harpidedun hurrengo galdetegi hontan.
